Concors de novèlas en occitan (e en francés tanben), fins al 8 de febrièr de 2024

"Lo bordièr se palfiquèt. Las vacas l’agachavan fixament. Dins la nuèit, un can jaupèt."
Escrivètz la seguida !

Las bibliotècas del Lector del Val (associacion de bibliotècas de Lauragués / sud-èst tolosan) organizan lor XIen concors de novèlas en occitan, dobèrt a totes e a gratís, fins al 8 de febrièr de 2024.

Lo concors prepausa quatre categorias : primàri, segondàri, licèus, adults (los tèxtes collectius son permeses se fan partida de l’ensenhament d’una classa tota). Lo tèxte deu necessariament començar amb la frasa çai-sus. Lo genre demòra liure : fantastic, policièr, sciéncia-ficcion, istoric, romanèsc, aventura, etc… o pas brica de genre que siá.
Totas las variantas de la Lenga d’Òc son planvengudas, a carga pel participant de passar l’incipit dins son dialècte pròpi.
Se pòt tanben participar en francés, a partir de la frasa : "Le fermier se figea sur place. Les vaches le regardaient fixement. Dans la nuit, un chien aboya."

La remesa dels prèmis se debanarà lo 1èr de junh de 2024 a la mediatèca de Rebigue e la remesa dels recuèlhs de novèlas als autors es prevista pel mes d’octobre de 2024. Un CD audiò de tèxtes occitans causits per la jurada serà fargat en mai de l’edicion del libre.

Per mai d'entresenhas o per obténer lo reglament : [email protected]
o sus la pagina : https://www.lecteurduval.org/310-concours-nouvelles.html.